Nota de prensa pola Comisión de Urbanismo do martes 21 de Setembro

Ante a celebración da Comisión de Urbanismo do Martes 21 de Setembro de 2010, ás 18:00, o concelleiro Martín Seco levará os seguintes temas a tratar, ademais dos xa incluidos polo grupo de goberno na orde do día.

1º Por segunda vez, despois de expoñelo na Comisión de Urbanismo do mes de Xullo e sendo xa avisado con anterioridade a esta comisión, algún dos dirixentes do PP na casa consistorial, o concelleiro Seco voltará a insistir na necesidade inminente de que se amañen os columpios existentes no parque infantil da Alameda Basanta Olano ou en tal caso, pola seguridade dos noso veciños máis xóvenes, sexan retirados aqueles que se atopan en mal estado e con altas posibilidades de causar dano físico ós usuarios destes columpios, para o cal exporá fotos do estado destes xogos que adxunto nesta comunicación e que dan conta do estado de peligrosidade no que se atopan.

2º A problemática pola mala situación de dous pasos de servicio existentes na Autovia A8, no seu paso pola parroquia de Santaballa, , un deles soterrado e a altura do Km 8,200 aproximadamente e outro elevado a altura do Km 9,600-9,700 , que causan moitos problemas ós veciños de Santaballa que poseen explotacións gandeiras e necesitan pasar con maquinaria dun lado a outro da autovia e non o conquiren debido ó mal estado que se atopan estes pasos con pendientes moi elevadas e cun firme de zahorra que fai que a maquinaria patine e non logre avanzar e ser utilizadas para aquelo que foron deseñadas. Despois do intenso traballo de negociación que no momento da construcción da autovia, efectuara o anterior secretario xeral do PSOE en Vilalba, Martín Seco Cendán para conquerir que a Conselleria de Ordenación do Territorio fixese todos aqueles pasos necesarios para os veciños desta parroquia, agora e tempo de que o noso Alcalde, efectue todas aquelas tramitacións ante dito organismo para conquerir que ditos pasos sexan asfaltados pola Xunta de Galicia ou facelo directamente polo Concello pedindo os permisos oportunos.

3º Coma en tódolas Comisións de Urbanismo que se levan celebrado ata o momento, esixirá unha vez máis que se fagan obras de acondicionamento nas rúas de Foz, Pepe Apenela e Mondoñedo, xa que é inaceptable que outra vez máis e xa non sabemos cantas van, se volte a rediseñar con apaños, a Praza da Constitución, non tendo en conta o momento de crise existente que fai que sexa necesario que a administración se comportara dun xeito austero, e o mesmo tempo paralize actuacións que consideramos que son prioritarias, mantendo certos barrios do noso casco urbán en mal estado e no abandono absoluto algunhas rúas como as enunciadas anteriormente, que malamente poden ser chamadas como tal o non poseer o mínimo esixible para elo. Ademáis pedirá unha nova regulación do tráfico nesta rúa de Foz e a rúa de As Pontes para evitar situacións imposibilidade de tránsito que está a pasar actualmente e que dende o noso grupo levamos toda a lexislatura pedindo.

4º Por último pedirei explicacións pola decisión final que tomará o goberno do Concello con respecto a peonalización da rúa Porta Decima que a estas alturas esperamos e desexamos xa teña tomada o señor Alcalde e o Grupo de Goberno do PP.

Blogs do meu querido amigo o pintor vilalbés Suso Trastoy e dos amigos do Clube de Loita de Vilalba

Desde o pasado mes de xullo o pintor chairego Xesús Trastoy Saavedra (Vilalba, 1941), de formación autodidacta, vén amosando en Internet unha mostra virtual do seu quefacer artístico que se pode visitar no seguinte enlace:

http://jesuspintura.blogspot.com/

Por outra banda os amigos do Clube de Loita de Vilalba, que fan unha gran labor polo deporte vilalbés e incluso máis aló da nosa pequena patria, tamén teñen un blog que dende aquí recomendo:

http://loitaolimpicavilalba.blogspot.com/

Sobre a organización das festas de San Ramón e Santa María por parte do Concello

“O Grupo Municipal Socialista de Vilalba volta a solicitar dos dirixentes do Partido Popular que amosen a valentía dos bos gobernantes e asuman o ano que ven a celebración das festas patronais de San Ramón e Santa María”

Dende o Grupo Municipal Socialista, como ven sendo habitual dende fai moitos anos, queremos recordarlles os nosos veciños, a nosa posición sobre a necesidade de que as festas patronais de San Ramón e Santa María sexan organizadas polos nosos responsables municipais, ó igual que o fan con outros actos festivos como é a celebración do FIV. Esta esixencia, queremos facela sen ánimo de entrar en ningún tipo de valoración da celebración das festas deste ano e respectando coma sempre a labor desinteresada que levan a cabo os membros da Comisión de Festas, que dende aquí, como veciños de Vilalba, agradecemos.

Antes de que a organización das festas de 2011 bote a andar, queremos solicitar dos nosos gobernantes a valentía política que fai falla para asumir a responsabilidade de organizar unhas festas dun pobo de máis de 15000 habitantes, que esixe unha maior profesionalidade nos nosos dirixentes, e unha capacidade de organización de eventos que ata o de agora o señor Criado e os seus compañeiros de partido non amosaron, agochándose nas sucesivas comisións de festas para esquivar as posibles responsabilidades da organización dun evento desta magnitude.

Facémolo porque teñen a súa disposición, toda a maquinaria necesaria para programar unhas boas festas, porque contan co tempo necesario para tal fin e teñen ó seu alcance os medios necesarios para coñecer as inquietudes dos nosos veciños. Por suposto que dita organización, debería ter en conta as forzas vivas da nosa vila e o sentir social do noso concello, polo que se debe de involucrar nesta organización, as asociacións existentes en Vilalba e porque non, involucrar tamén a aqueles veciños que desexen participar, formando parte da comisión de festas, sen perder por parte do concello, a responsabilidade última da organización dun evento tan importante para os vilalbeses.

Unhas festas como as patronais do noso concello, que xa obstentan unha categoría importante, non pode estar a expensas de que un grupo de veciños, poida ou non, mostrar a súa dispoñibilidade a organizalas, nin estar a espera de que ese grupo de persoas o faga dun xeito acorde cos gustos dos nosos cidadáns, este peso só pode recaerlle a aqueles que se presentaron a unhas eleccións para representar públicamente os seus veciños e foron elexidos para tal fin, polo tanto, teñen a resposabilidade de asumir o desgaste da organización dun evento deste nivel e saber encaixalas críticas ou os alagos que surxan da súa xestión, do mesmo xeito que dende o concello, lévase a cabo a organización dun festival como o FIV, cun éxito relativamente baixo de convocatoria, para a elevada cuantía, “40.000 euros”, invertida nun festival que endulza os gustos musicais de moi poucos dos nosos veciños, pero que dende o grupo de goberno lévase a cabo para contentar a uns poucos veciños.

Dende o noso Grupo, e coma sempre, amosamos a nosa dispoñibilidade absoluta para colaborar co grupo de goberno do PP para tal fin.

Nota sobre a posible peonalización da Porta Decima

Unha vez que comeza a verse o resultado das obras de rehabilitación da rúa Porta Decima, cun resultado que os socialistas valoramos positivamente. Dende o noso grupo político, observamos como chegan certas informacións, esgrimidas por algún veciño da zona, xunto coa colocación de mobiliario decorativo na entrada da rúa, que fan que exista a posibilidade de que o Grupo de Goberno do Partido Popular, poida estar valorando a peonalización de dita rúa do noso casco histórico, e digo observamos, posto que ninguén do Grupo Municipal Socialista, como ven sendo habitual nesta lexislatura, foi avisado de tal posibilidade polos gobernantes do Partido Popular, en ningunha reunión oficial, extraoficial, nin tan sequera cunha simple chamada telefónica a nosa portavoz ou a algún membro do noso grupo.

Se fose certa dita información ou simplemente a existencia de dita posibilidade, dende o Grupo Municipal Socialista aplaudimos ao señor Alcalde e o PP para que continúen adiante con esta peonalización, que dende fai moitos anos, este e os anteriores grupos municipais socialistas, reivindicaron publicamente e que tamén incluíron nos sucesivos programas políticos de cara ás citas electorais. Animamos tamén ó PP a que este, sexa o primeiro paso, de cara a unha maior peonalización da zona vella do noso casco histórico, que continúe coa Praza de Santa María e algunha das rúas que levan a ela, sabendo que contan co leal apoio do grupo maioritario da oposición para facelo. Tamén queremos animar a aqueles veciños, que non teñan clara dita peonalización, a que pensen a que a medio e longo prazo serán os grandes beneficiados desta decisión, como sucedeu neutros concellos do noso entorno, en que moitos veciños, tamén dubidaron da idoneidade de facelo e que agora están encantados con que se tomaran estas decisións no seu tempo.

Nada máis que rexeitar o xeito tan pouco transparente e democrático co que o PP segue a tratar ao partido maioritario na oposición, que ten que decatarse dos novos proxectos que quere desenrolar o Grupo de Goberno da nosa vila, polos comentarios de veciños ou por informacións dos medios de comunicación, sen que exista por parte do Alcalde nin do seu grupo, nin unha soa chamada aos membros do noso grupo, nin a convocatoria da nosa Portavoz para informala ou buscar puntos de encontro co noso grupo. Sendo de maior gravidade, que nin tan sequera se intentase informar deste tema aos membros da oposición, nunha recente comisión de urbanismo celebrada a finais de Xuño, cando os nosos gobernantes xa deberían de ser coñecedores deste cambio de proxecto para a Porta Decima, tendo en conta que sobre esta rehabilitación, o noso grupo, preguntou polo menos en dúas ocasións en ditas comisións, sen ter sido informada sobre ningunha posibilidade de peonalización. Esperamos e desexamos para este final de lexislatura, un cambio de actitude no PP, posto que dende o grupo municipal socialista, ansiamos poder colaborar lealmente co grupo de goberno en aqueles asuntos de interese para o noso concello e só o comportamento de boicot do PP cara a nós, fai imposible que así sexa.

.

Martín Seco García
Concelleiro do GMS de Vilalba

Gurús e democracia interna

Outro día máis, amencemos coa noticia de que o peixe poderoso trata de engulir ao pequeno, cando xa non necesita dos seus servizos. Unha vez máis, trátase de impoñer a intuición divina dos gurús políticos, por riba do que pensa a militancia que paga relixiosamente as súas cuotas. Unha vez máis, trátase de utilizar o que din “oportunas” enquisas, sobre un traballo serio a longo prazo, que intenta conseguir o goberno da comunidade madrileña con honestidade política e cun proxecto que apoian as bases desta organización.

O problema de todo isto, é que este tipo de actuacións repítense por toda a xeografía estatal e somos moitos, os que levamos sufrido atropelos deste tipo.

Cando aprenderemos a respectar aos que merecen ter a oportunidade de dirixir un proxecto serio e traballado, cando respectaremos o que desexa a militancia, cando será o momento que primen os proxectos, a seriedade e o contido programático sobre a oportunidade política, porque se lle rouba o caramelo da boca a quen renunciou a seguir sendo o alcalde máis votado de toda España, para sacarlle as castañas do lume a un proxecto político desnortado e sen liderado, que atopou nesta nova dirección, unha ilusión perdida nesta parte da xeografía estatal.

Mentres se tratan de potenciar novos mecanismos que fortalezan a democracia e a participación da nosa sociedade, coa creación de mellores regulamentos de participación cidadá, creación dos chamados orzamentos participativos, e outras medidas que se están a tomar en certas administracións. Os partidos políticos, uns como o PP, ancorados no inmobilismo absoluto, e outros que fai un tempo parecía que tomaban o camiño da modernidade, seguen a dar pasos atrás, nunha dirección contraria a que esixen os cidadáns, que se senten cada vez máis afastados da política e sobre todo dos seus políticos.

Por iso non me resigno, e sen medo a dicir o que penso, animo a Tomás Gómez a continuar con valentía, no proxecto que honestamente lidera, porque somos moitos os que esperamos que a dirección federal do Partido Socialista reflexione sobre o tipo de partido que desexa e que non volte a cometer os erros do pasado nesta comunidade. Espero que estas noticias que aparecen día a día en diarios de prestixio, sexan corrixidas ou en todo caso que o mecanismo das primarias sexa o que permita que a militancia dirima entre dúas sensibilidades diferentes.

Mentres o fago, observo desilusionado o que sucede na política do noso país, dende o templete da nosa Alameda.

Martín Seco García